Krenarë për Shqipërinë në NATO!

E pashë flamurin tim Kombëtar të valëvitej përkrah flamurit të Aleancës më të madhe e më të fuqishme Ushtarako-Politike në Botë. Është një nga ato raste të veçanta të jetës, që ndihesh krenar, që lotët të vijnë në sy prej gëzimit përzier me dhimbje. Më parë e kisha kuptuar sadopak çfarë do të thoshte mungesa e Famurit Kombëtar Shqiptar në krah të Flamujve të 26 vendeve anëtare të NATO-s. Tani sadopak e kuptoj çfarë do të thotë që Flamuri im Kombëtar, më shkabën dykrenare, ndodhet aty, në të njëjtin fllad që e tund përkrah një prej ikonave më perëndimore në Glob, Flamurit të NATO-s. Dhe ndihem krenar, por edhe i sigurt, se tani politikanët e vendit tim do të kenë më pak shanse të luajnë me jetën time dhe më i bindur se politikanët e vendit tim kanë shumë më pak mundësi të veprojnë keq...